Natutong Umibig Muli

Sa baybay narinig tinig ng hangin,
pagdaloy ng agos, pag-ibig ng Diyos.
Lumubog na ang ating araw,
pumanaw, humimlay sa abot-tanaw.
Umidlip sumandali sa kandungang langit,
nang ako’y tangalawan ng liwanag ng buwan
natutong umibig muli.
Sa laot nabatid titik at himig,
Mga ibon nagsitipon.
Lumukso’t sumayaw bituin at tala
hinaplos, hinagkan ng kadiliman.
Umidlip sumandali sa kandungang langit,
at muling nadama init ng kalinga
natutong umibig muli.
Sa baybay narinig tinig ng hangin,
Sa laot sinagot ang hamon ng Diyos.
Umidlip sumandali sa kandungang langit,
tunay na natanto ganap na paghango
natutong umibig muli.
Tunay na natanto tamis ng paghango
natutong umibig muli.