Napule ca se ne va

E sò sbarcate 'nterra Marechiare
Tre cumitive 'e vascio â Sanità:
Sò ddoje coppie 'e 'nnammurate
Ddoje maeste 'ngannaccate
Cu 'e marite e 'nu cumpare
Viecchio «capo 'e suggità»
E che tavula speciale!
'Nterra 'o cato cu 'a frutta e 'o vino
'Nu mellone dint'â cantina
'O cumpare dint'â cucina
Ca discute cu 'a principale
E 'a luna guarda e dice:
«Si fosse ancora overo!
Chisto è 'o popolo 'e 'na vota
Gente semplice e felice!
Chist'è Napule sincero
Ca pur’isso se ne va»
Divotamente mo se fanno 'a croce
Comm'è ll’usanza, primma 'e accummincià
'O cumpare ch'è 'struito
Fa 'nu brinnese «in pulito»
Lle risponne, a una voce
Tutt' 'a tavula: «Addò va!»
'A siè Rosa ca se cunzola
Pe' sti suone ca sò venute
Pe' 'sta voce ch'è fina e bella
P' 'a canzona ch'è «Palummella»
Palummella ca zompa e vola
E 'a luna guarda e dice:
«Si fosse ancora overo!
Chisto è 'o popolo 'e 'na vota
Gente semplice e felice!
Chist'è Napule sincero
Ca pur’isso se ne va»
'E ttre ffamiglie tornano vucanno
'Nu poco fatte a vino tutt' 'e ttre
'A varchetta 'e ccunnulea
'Na maesta scapuzzea
'O cumpare parla 'e quanno
Quanno 'o guappo era 'nu rre
'E ffigliole, pe' sottaviento
Mo se fanno 'na zuppetella
Cu 'e taralle 'int'a ll’acqua 'e mare
Ll’acqua smoppeta fragne e pare
Ca 'e mmanelle sò tutte 'argiento
E 'a luna guarda e dice:
«Si fosse ancora overo!
Chisto è 'o popolo 'e 'na vota
Gente semplice e felice!
Chist'è Napule sincero
Ca pur’isso se ne va»